Om T10-dagen

T10-dagen 2009 vel i hamn!

Tusen hjarteleg takk til alle dykk som fylte Foldnes kyrkje på T10-dagen fredag 6. november. Takk til alle dykk som bakte, sjonglerte, spelte trommer, lærte fyrstehjelp, laga kunst, spelte fotball, padla, klatra, song og lærte mykje om Bibelen! Takk for at vi fekk bli kjent med dykk! Vi vonar å sjå dykk igjen på T11-dagen med "Lys Våken" i Foldnes kyrkje 20.-21. mars.

Her får de sjå ein del foto frå T10-dagen. Kan hende finn du eit bilete av deg sjølv eller nokon du kjenner?

Registrering

Tidleg om morgonen møtte tiåringane opp i Foldnes kyrkje. Dei fleste hadde hugsa å pakke med seg både godt humør og Bibelen. Ved registreringa fekk dei tildelt både fargegruppe og aktivitetsgruppe, og så var vi klare til å starte.

Svisj

Første post på programmet var "Svisj". Det er noko vi ofte har i starten av T-dagar. Vi syng saman og får vite noko om kva som skal skje i løpet av dagen. I menighetssalen var 87 tiåringar samla, klare for ein innhaldsrik dag.

Arbeid med den levande boka

Tiåringane høyrde, lærde om og opplevde tre bibelforteljingar: Forteljinga om Josef og brørne hans, likninga om såmannen og forteljinga om den lamme mannen som Jesus helbreda. Formidlingsformene varierte mellom samtale, flanellograf og ei vandring med fleire stasjonar i kyrkjerommet. Borna brukte Bibelen aktivt.

Lunsj

Aktivitetsgrupper

Det var mange ulike aktivitetar å velje mellom i år òg, og det verka som om tiåringane koste seg.

På kokkegruppa laga dei deilige skillingsboller og ein frisk og god fruktsalat.

Ei anna gruppe fekk lære sjonglering av den kjempedyktige sjongløren Anette.

På målegruppa laga dei kunst som dekorerte kyrkjerommet på festforestillinga.

Førstehjelpsgruppa lærte mykje som kan vere godt å kunne i ein krisesituasjon.

Harald prest var leiar for trommegruppa, og dei øvde inn rytmer til festforestillinga på kvelden.

På collageverkstaden blei det trylla fram flotte bilete ved hjelp av mange ulike materiale, som til dømes tapet og glitterlim. Nokre nytta kreativiteten sin til å flette håret på kvarandre.

Friluftsgruppa var heldige med vêret i år òg. Dei padla i kano, klatra i fjellveggen og steikte pinnebrød i lavvoen.

Fotballgruppa, under kyndig leiing av prest og trenar Terje, spela seg varme i gymsalen på Foldnes skule.

Tusen takk til alle dei flotte leiarane som var med oss denne dagen, og særleg dei som ikkje vanlegvis høyrer til kyrkjestaben, men som møtte ulønna og "frivillig".

Korøving og fest

Etter aktivitetsgruppene var det korøving, film og gruppesamling, og så kom foreldre og sysken for å ete middag med oss. T10-dagen blei avslutta i kyrkjerommet, med ei flott festavslutning. Først fekk vi sjå bilete frå dagen. Deretter kom prosesjonen som synte noko av det vi hadde gjort denne dagen. Så var det mellom anna korsong, trommer og sjonglering. Tusen takk til TenSing-musikarane som spelte i bandet! Kyrkjerommet var dekorert med T10-kunst.

Vi sjåast på T11!

Endå ein gong tusen takk til alle som var i sving på T10-dagen, både små og store! Vi vonar å sjå mange av dykk, og kanskje endå fleire, på T11-dagen i 2010. Det blir eit "Lys Våken"-arrangement, med overnatting i kyrkja. Dette skjer 20.-21. mars 2010 i Foldnes kyrkje, og vi gler oss veldig.