Om T3-dagen
Takk for ein flott T3-dag!
Søndag 29. desember var det endeleg klart for ny T3-dag, og vi gledde oss til å treffe att vener frå tidlegare T-dagar, og kan hende nokre "nye" òg? Det blei ein spanande dag med mange inntrykk for store og små. Gjennom mellom anna forming, forteljing og musikk, leika vi oss gjennom temaet advent. Takk til alle de som var med oss denne dagen! Vi vonar å sjå dykk alle på ein T4-dag i 2010, og inntil vi sjåast igjen, kan de kose dykk med bileta frå T3-dagen.
Svisj - vi er saman!
Fyrste post på T3-programmet var ein såkalla "svisj", leia av Trude. Vi tende T-dagslyset, song ein julesong, og fekk vite litt om korleis programmet såg ut vidare.
Forteljing, musikk og forming
Vidare i programmet var borna og deira føresette plassert i grupper som var innom tre ulike stasjonar, slik at alle fekk vere med på tre aktivitetar: Dei fekk høyre juleevangeliet fortalt av Anne Karin, dei fekk syngje og spele julesongar saman med Josh, og dei laga stjerne og englekort saman med Trude og Elisabeth.
Kaffikos
Etter alle sanseinntrykka smakte det godt med kringle, saft og kaffi. Praten gjekk livleg ved borda.
Myldregudsteneste
Så var det tid for avslutninga: Ei riktig myldregudsteneste. Først var det høgtideleg prosesjon, og alle T3-arane fekk henge opp kvar si stjerne på stjernehimmelen over julekrubba. Deretter fekk dei mellom anna følge snorer som gjekk på kryss og tvers i kyrkjerommet, og i enden av kvar snor var det noko som høyrde til i krubba. Slik vart krubba etterkvart komplett, med vismennene, gjetarane, stjerna, engelen... og sjølvsagt barnet i krubba. Vi song òg julesongar og hadde i det heile ei fin adventsstund i lag. Harald og Marianne leia oss igjennom programmet. Torgeir, Astrid og Harald spela til songane.
